जेएनएन, मुंबई. गेल्या काही दिवसांपासून दडी मारलेल्या पावसाने अखेर राज्यात पुन्हा दमदार हजेरी लावली आहे. गणपती बाप्पाच्या आगमनाच्या पार्श्वभूमीवर मुंबईसह महाराष्ट्रातील अनेक भागांत पावसाची संततधार सुरू झाल्याने नागरिकांना सुखद धक्का बसला आहे. पावसाच्या प्रतीक्षेत असलेल्या बळीराजालाही या पावसामुळे मोठा दिलासा मिळाला आहे. रविवारी मुंबईसह अनेक भागांत जोरदार पाऊस झाला असून, सोमवारीही पावसाचा जोर कायम राहण्याचा अंदाज हवामान विभागाने व्यक्त केला आहे.
शनिवार रात्रीपासून मुंबई आणि उपनगरांमध्ये पावसाला सुरुवात झाली. रविवारी सकाळपासून पावसाचा जोर वाढला. मुंबईतील बीकेसी, चेंबूर, मागाठाणे यांसह अनेक भागांत काही तासांत मोठ्या प्रमाणात पाऊस नोंदवला गेला. काही भागांमध्ये सखल रस्त्यांवर पाणी साचल्याने वाहतुकीवरही परिणाम झाला.
सोमवारी सकाळी पावसाचा जोर
आजही सकाळच्या सुमारास मुंबईत पावसाचा जोर कायम आहे. त्यानंतर दुपारनंतर पावसाची तीव्रता काहीशी कमी होण्याचा अंदाज आहे. मात्र, ढगाळ वातावरण आणि अधूनमधून पावसाच्या सरी सुरू राहण्याची शक्यता असल्याने मुंबईकरांनी घराबाहेर पडताना खबरदारी घेण्याचे आवाहन करण्यात आले आहे.
मुंबईसोबतच ठाणे, पालघर, रायगड आणि राज्यातील इतर अनेक जिल्ह्यांमध्येही पावसाचे वातावरण आहे. हवामान विभागाने राज्यातील अनेक भागांसाठी पावसाचा इशारा दिला असून, काही जिल्ह्यांना यलो तर काही भागांना ऑरेंज अलर्ट देण्यात आला आहे.
कमी दाबाच्या क्षेत्रामुळे पावसाला बळ
बंगालच्या उपसागरात निर्माण झालेल्या कमी दाबाच्या क्षेत्रामुळे महाराष्ट्रातील मान्सून पुन्हा सक्रिय झाला आहे. या हवामान प्रणालीचा प्रभाव महाराष्ट्राच्या विविध भागांवर जाणवत असून, पुढील काही दिवस राज्यात पावसाच्या सरी सुरू राहण्याची शक्यता आहे. उत्तर कोकण, मध्य महाराष्ट्र आणि काही विदर्भातील भागांतही पावसाची शक्यता वर्तवण्यात आली आहे.
बळीराजाला मोठा दिलासा
पावसाने काही दिवस विश्रांती घेतल्याने राज्यातील अनेक भागांमध्ये शेतीच्या पिकांना पाण्याची गरज निर्माण झाली होती. विशेषतः सोयाबीन, कापूस आणि इतर खरीप पिकांसाठी सध्याचा पाऊस महत्त्वाचा मानला जात आहे. गणेशोत्सवाच्या सुरुवातीलाच पावसाने जोर धरल्याने शेतकऱ्यांच्या चेहऱ्यावर समाधान दिसत आहे.
मात्र, काही भागांत पावसाचे प्रमाण अतिवृष्टीकडे गेल्यास उभ्या पिकांना नुकसान होण्याची शक्यता आहे. त्यामुळे शेतकऱ्यांनी स्थानिक हवामानाचा अंदाज लक्षात घेऊन आवश्यक ती खबरदारी घेणे महत्त्वाचे ठरणार आहे.
गणेशोत्सवावरही पावसाचे सावट
दरम्यान, गणेशोत्सवाला सुरुवात होत असतानाच पावसाने जोर धरल्याने गणेशभक्तांचीही काहीशी चिंता वाढली आहे. गणेशमूर्तींची प्रतिष्ठापना, मिरवणुका, सार्वजनिक मंडप आणि घरगुती गणपतीच्या आगमनावर पावसाचा परिणाम होऊ शकतो. मुंबईतील सखल भागांमध्ये पाणी साचण्याची शक्यता असल्याने नागरिकांनी प्रशासनाच्या सूचनांचे पालन करण्याचे आवाहन करण्यात आले आहे.
