जेएनएन, कल्याण: महाराष्ट्र राज्य शिक्षक पात्रता परीक्षा अर्थात TET 2026 पेपरफुटी प्रकरणात ठाणे पोलिसांनी भिवंडी न्यायालयात तब्बल 3500 पानी दोषारोपपत्र दाखल केले आहे. या दोषारोपपत्रात इलेक्ट्रॉनिक आणि तांत्रिक पुराव्यांसह सीसीटीव्ही फुटेज, कॉल डिटेल रेकॉर्ड, आर्थिक व्यवहार, साक्षीदारांचे जबाब तसेच तपासात समोर आलेल्या अन्य महत्त्वाच्या पुराव्यांचा समावेश आहे.
28 जून रोजी होणारी TET परीक्षा पेपरफुटीमुळे ऐनवेळी स्थगित करावी लागली होती. परीक्षा होण्याच्या दोन दिवस आधी भिवंडी परिसरात प्रश्नपत्रिका विक्रीसाठी आणल्याची माहिती पोलिसांना मिळाली होती. त्यानंतर पोलिसांनी सापळा रचून काही संशयितांना ताब्यात घेतले आणि त्यांच्याकडून प्रश्नपत्रिकांचे संच जप्त केले. शिक्षण विभागाच्या अधिकाऱ्यांनी केलेल्या पडताळणीत जप्त केलेले पेपर हे आगामी परीक्षेतील प्रत्यक्ष प्रश्नपत्रिकेशी जुळत असल्याचे समोर आले.
मुद्रणालयातून प्रश्नपत्रिका बाहेर काढल्याचा आरोप
पोलिसांच्या तपासानुसार, प्रश्नपत्रिका उत्तर प्रदेशातील आग्रा येथील मुद्रणालयातून बाहेर काढण्यात आल्याचा आरोप आहे. दोषारोपपत्रातील माहितीनुसार, मुद्रणालयातील कर्मचाऱ्यांनी प्रश्नपत्रिकांचे कागद चपलेच्या तळव्यामध्ये लपवून बाहेर नेल्याचे तपासात समोर आले आहे. या कामासाठी त्यांना कथितपणे पैसे देण्यात आले होते.
तपासात बिजेंद्र गुप्ता याला या कथित रॅकेटचा प्रमुख सूत्रधार म्हणून पोलिसांनी नमूद केले आहे. प्रश्नपत्रिका मिळवणे, तिची वाहतूक आणि पुढे वितरणासाठी इतर आरोपींशी संपर्क साधल्याचा आरोप त्याच्यावर आहे. मात्र, हे सर्व आरोप असून त्याचा अंतिम निर्णय न्यायालयीन प्रक्रियेत होणार आहे.
16 आरोपी अटकेत
या प्रकरणाच्या तपासासाठी विशेष तपास पथकाची (SIT) स्थापना करण्यात आली होती. तपासाचा विस्तार महाराष्ट्रासह बिहार, उत्तर प्रदेश, हरियाणा आणि दिल्लीपर्यंत झाला. आतापर्यंत 16 आरोपींना अटक करण्यात आली आहे. उपलब्ध माहितीनुसार, आणखी दोन आरोपी फरार असून त्यांचा शोध सुरू आहे. त्यांना अटक झाल्यानंतर किंवा तपासातील काही प्रलंबित अहवाल प्राप्त झाल्यानंतर पूरक दोषारोपपत्र दाखल केले जाण्याची शक्यता पोलिसांनी व्यक्त केली आहे.
मूळ प्रश्नपत्रिका आणि डिजिटल पुरावे महत्त्वाचे
तपासादरम्यान आरोपींकडून प्रश्नपत्रिकांच्या प्रती जप्त करण्यात आले आहे. त्यानंतर कथित मुख्य आरोपीशी संबंधित ठिकाणाहून मूळ प्रश्नपत्रिकाही हस्तगत करण्यात आल्याचे तपास अधिकाऱ्यांनी सांगितले आहे. तसेच आरोपींमधील फोनवरील संभाषण, कॉल डिटेल रेकॉर्ड, सीसीटीव्ही फुटेज आणि आर्थिक व्यवहारांची माहिती दोषारोपपत्रात समाविष्ट करण्यात आली आहे.
जलदगती न्यायालयात खटला
या प्रकरणाचे गांभीर्य लक्षात घेऊन मुंबई उच्च न्यायालयाच्या निर्देशानुसार खटला जलदगती न्यायालयात चालवण्याची व्यवस्था करण्यात आली आहे. भिवंडी प्रथम वर्ग न्यायालयातील न्यायाधीश ए. ए. कोरे यांच्या न्यायालयात पुढील कायदेशीर प्रक्रिया होणार आहे. त्यामुळे दोषारोपपत्र दाखल झाल्यानंतर आता आरोपींवरील आरोप निश्चिती आणि त्यानंतरच्या न्यायालयीन सुनावणीला वेग येण्याची शक्यता आहे.
दरम्यान, TETसारख्या महत्त्वाच्या पात्रता परीक्षेची प्रश्नपत्रिका परीक्षेपूर्वीच बाहेर पडल्याने परीक्षा प्रक्रियेच्या सुरक्षेवर प्रश्न उपस्थित झाले होते. आता पोलिसांनी तपासातील पुराव्यांच्या आधारे दोषारोपपत्र दाखल केल्याने या प्रकरणातील पुढील न्यायालयीन कारवाईकडे शिक्षक पात्रता परीक्षा देणाऱ्या उमेदवारांसह शिक्षण क्षेत्राचे लक्ष लागले आहे.
