जेएनएन, नवी दिल्ली: राज्य सीईटी सेलने राज्यातील बी. फार्मसी (औषधनिर्माणशास्त्र) अभ्यासक्रमांना प्रवेश (B. Pharmacy Admission 2025 Schedule) घेण्याऱ्या विद्यार्थांना दिलासा दिला आहे. त्यांनी सोमवारी प्रवेशाचे वेळापत्रक जाहीर केले आहे. त्यामुळे विद्यार्थांमध्ये उत्साहाचे वातावरण आहे.  

सीईटी सेलच्या वेळापत्रकानुसार, 25 ते 27 सप्टेंबर या काळात विद्यार्थ्यांना प्रवेशासाठी महाविद्यालयांचे पसंतीक्रम भरता येणार आहेत. त्यानंतर 29 सप्टेंबर रोजी पहिली प्रवेश यादी जाहीर होणार असून, संपूर्ण प्रवेश प्रक्रिया 12 नोव्हेंबरपर्यंत चालणार असल्याची माहिती सीईटी सेलकडून देण्यात आली. यंदाच्या शैक्षणिक वर्षात तब्बल 54 हजार 921 विद्यार्थ्यांची अंतिम यादी जाहीर झाली आहे.  

B. Pharmacy Admission 2025 साठी वेळापत्रक जाहीर

यंदाच्या शैक्षणिक वर्षात राज्यातील विविध खासगी संस्थांनी मागील काही दिवसांपर्यंत फार्मसी कौन्सिल ऑफ इंडियाकडून नव्याने मान्यता आणि तुकडी वाढ करून घेतली. यामुळे हे प्रवेश लांबणीवर पडले होते, मात्र सीईटी सेलने हे वेळापत्रक जाहीर केल्याने विद्यार्थ्यांना मोठा दिलासा मिळाला.

'फ्रीझ' किंवा 'बेटरमेंट'

यंदाच्या प्रवेशात एकूण प्रवेशाच्या चार फेऱ्या होणार आहेत. प्रत्येक फेरीत प्रवेश मिळालेल्या विद्यार्थ्यांनी स्वतःच्या लॉगइनद्वारे पसंतीनुसार प्रवेश स्वीकारणे आवश्यक आहे. त्यासाठी 'फ्रीझ' किंवा 'बेटरमेंट' असे दोन पर्याय उपलब्ध असतील. 

    फ्रीझ पर्याय काय आहे?

    जर विद्यार्थ्याला मिळालेले फार्मसी महाविद्यालय पसंत असेल, तर तो फ्रीझ पर्याय निवडून ती जागा निश्चित करू शकतो.

    बेटरमेंट पर्याय कधी वापरायचा?

    विद्यार्थ्याला पुढील फेरीत यापेक्षा चांगले महाविद्यालय मिळावे, अशी अपेक्षा असेल, तर त्याने बेटरमेंट पर्याय निवडणे गरजेचे आहे.

    माहिती अद्ययावत करण्याचे निर्देश

    33 हजार विद्यार्थ्यानी डी फार्मसीच्या प्रवेशासाठी अर्ज केले आहेत, मात्र अजूनही महविद्यालयांची मान्यता झालेली नाही. राज्यातील फार्मसी पदविका संस्थांनी येत्या 24 सप्टेंबरपर्यंत प्रवेशाची सर्व माहिती अद्ययावत करण्याचे स्पष्ट निर्देश तंत्रशिक्षण संचालनालयाने दिले आहेत. 

    पदवी प्रवेशाचे वेळापत्रक

    • 25 ते 27 सप्टेंबर : प्रवेशासाठी पसंतीक्रम, संस्था पर्याय ओपन होणार
    • 29 सप्टेंबर : प्रवेशाची पहिली फेरी होणार
    • 30 सप्टेंबर ते 3 ऑक्टोबर: प्रवेश घेणे व कागदपत्र पडताळणी होणार
    • 4 ऑक्टोबर : दुसऱ्या फेरीसाठी रिक्त जागांची यादी जाहीर होणार
    • 5 ते 7 ऑक्टोबर : प्रवेशासाठी पसंतीक्रम, संस्था पर्याय ओपन होणार
    • 10 ऑक्टोबर : प्रवेशाची दुसरी यादी जाहीर
    • 11 ते 13 ऑक्टोबर : प्रवेश घेणे व कागदपत्र पडताळणी होणार
    • 14 ऑक्टोबर : पुन्हा रिक्त जागा जागांची यादी जाहीर होणार
    • 15 ते 17 ऑक्टोबर : प्रवेशासाठी पसंतीक्रम, संस्था पर्याय ओपन होणार
    • 19 ऑक्टोबर : प्रवेशाची तिसरी फेरी सुरु होणार 
    • 25 ते 27 ऑक्टोबर: प्रवेश घेणे व कागदपत्र पडताळणी होणार
    • 28 ऑक्टोबर : रिक्त जागांची माहिती मिळणार
    • 29 ते 31 ऑक्टोबर : प्रवेशासाठी पसंतीक्रम, संस्था पर्याय ओपन होणार
    • 2 नोव्हेंबर : प्रवेशाची चौथी फेरी सुरु होणार
    • 3 ते 6 नोव्हेंबर : प्रवेश घेणे व कागदपत्र पडताळणी होणार
    • 7 ते 14 नोव्हेंबर : संस्था स्तरावरील प्रवेश प्रक्रिया सुरु होणार
    • 12 नोव्हेंबर : प्रवेश रद्द करून पूर्ण शुल्क परत घेण्याचा अंतिम दिवस असणार
    • 14 नोव्हेंबर : प्रवेश प्रक्रियेची अंतिम तारीख.

    महत्त्वाचे 

    पहिल्या पसंतीचे महाविद्यालय मिळाल्यास तो प्रवेश आपोआप 'ऑटो फ्रीझ' होईल आणि त्या विद्यार्थ्यांना पुढील फेरीत भाग होता येणार नाही. तसेच प्रवेश निश्चित करताना ऑनलाइन शुल्क भरणे बंधनकारक आहे.

    चुकीची कागदपत्रे सादर केल्यास किंवा खोटी माहिती दिल्यास उमेदवाराचा प्रवेश नाकारला जाईल, असे सीईटी कक्षाने जाहीर केले आहे.