जेएनएन, मुंबई: राष्ट्रीय हँडलूम दिनाच्या पूर्वसंध्येला पंतप्रधान नरेंद्र मोदी यांनी देशवासीयांना हँडलूम (हातमाग) उत्पादने खरेदी करण्याचे आणि त्यांची माहिती जगभर पोहोचवण्यासाठी सोशल मीडियावर व्हिडिओ शेअर करण्याचे आवाहन केले आहे. यामुळे देशातील विणकर, कारागीर आणि छोट्या उद्योजकांना आर्थिक मदत मिळेल, असे त्यांनी सांगितले.
पंतप्रधान मोदी यांनी त्यांच्या इन्स्टाग्राम अकाउंटवर एक व्हिडिओ शेअर करत 7 ऑगस्ट रोजी साजऱ्या होणाऱ्या राष्ट्रीय हँडलूम दिनाचे महत्त्व अधोरेखित केले. "भारतातील हँडलूम उत्पादनांची विविधता जगासमोर आणूया. तुमच्या आवडत्या हँडलूम उत्पादनांसोबत 'Get Ready With Me'सारखे व्हिडिओ तयार करा आणि सोशल मीडियावर शेअर करा," असे त्यांनी म्हटले.
मोदी यांनी 7 ऑगस्ट 1905 रोजी ब्रिटिशांविरोधात सुरू झालेल्या स्वदेशी आंदोलनाची आठवण करून दिली. या आंदोलनाने देशवासीयांना स्वदेशी वस्तूंचा स्वीकार करण्यासाठी एकत्र आणले होते, असे त्यांनी सांगितले. नुकताच फ्रेंडशिप डे साजरा झाल्याचा उल्लेख करत त्यांनी, "7 ऑगस्ट रोजी राष्ट्रीय हँडलूम दिनही तितक्याच उत्साहाने साजरा करा," असे आवाहन केले.
हँडलूम उत्पादनांबाबत जागरूकता वाढवण्यासाठी छोटेखानी व्हिडिओ तयार करून ऑनलाइन शेअर करण्याचे आवाहन करताना मोदी म्हणाले की, यामुळे भारतीय हँडलूमला जागतिक स्तरावर ओळख मिळेल. तसेच 'आत्मनिर्भर भारत' अभियानाला बळ मिळून विणकर आणि छोट्या व्यापाऱ्यांना आर्थिक आधार मिळेल.
पंतप्रधानांनी नागरिकांना हँडलूम उत्पादने खरेदी करून भारतीय कारागिरांच्या कष्टांना प्रोत्साहन देण्याचे आणि त्यांच्या कामाचा प्रचार सोशल मीडियाच्या माध्यमातून करण्याचे आवाहन केले.
हेही वाचा: Dahi Handi 2026: दहीहंडी उत्सवातील 1.60 लाख गोविंदांना राज्य सरकारकडून 10 लाखांचे विमा कवच; शासन निर्णय जारी
