पुणे. Pune News: पुणे जिल्हा परिषदेच्या आर्थिक वर्ष 2026-27 च्या पुरवणी अर्थसंकल्पाला सुमारे ₹333 कोटींची मंजुरी देण्यात आली आहे. या पुरवणी अर्थसंकल्पातून शिक्षण, विज्ञान, महिला सक्षमीकरण आणि दिव्यांग कल्याणावर विशेष भर देण्यात आला आहे. दिवंगत उपमुख्यमंत्री अजित पवार यांनी सुचवलेल्या विकासदृष्टीला पुढे नेत त्यांच्या नावाने तीन महत्त्वाकांक्षी योजना राबविण्याचा निर्णय घेण्यात आला असल्याचे सांगण्यात आले आहे.
अजित पवारांच्या नावाने 3 मोठ्या योजना
1) सायन्स पार्क प्रकल्प
ग्रामीण भागातील विद्यार्थ्यांमध्ये विज्ञान आणि आधुनिक तंत्रज्ञानाची आवड निर्माण करण्यासाठी दोन सायन्स पार्क उभारण्याचा निर्णय घेण्यात आला आहे. विद्यार्थ्यांना प्रत्यक्ष प्रयोग, नवकल्पना आणि संशोधनाची संधी उपलब्ध करून देणे हा या योजनेचा उद्देश आहे.
2) ‘माझे अस्तित्व’ योजना
एकल महिलांना आर्थिक व सामाजिक आधार देण्यासाठी ‘माझे अस्तित्व’ योजना राबविण्यात येणार आहे. या योजनेत स्वावलंबन, कौशल्य विकास आणि विविध शासकीय योजनांचा लाभ एकाच छताखाली उपलब्ध करून देण्यावर भर असणार आहे .
3) दिव्यांगांसाठी विशेष कल्याण योजना
दिव्यांग नागरिकांसाठी आवश्यक साहित्य, सहाय्यक उपकरणे, पुनर्वसन आणि कौशल्य प्रशिक्षण उपलब्ध करून देण्यासाठी स्वतंत्र निधीची तरतूद करण्यात आली आहे. यामुळे दिव्यांगांना रोजगाराच्या अधिक संधी उपलब्ध होतील, असा जिल्हा परिषदेचा विश्वास आहे.
शिक्षण आणि तंत्रज्ञानावर विशेष भर
पुरवणी अर्थसंकल्पात ग्रामीण विद्यार्थ्यांना कृत्रिम बुद्धिमत्ता (AI) आणि आधुनिक तंत्रज्ञानाची ओळख करून देण्यासाठी ‘कौशल्य सेतू’ उपक्रमालाही चालना देण्यात आली आहे. शिक्षकांचे प्रशिक्षण, डिजिटल शिक्षण आणि विद्यार्थ्यांचे कौशल्यविकास यासाठी अतिरिक्त निधीची तरतूद करण्यात आली आहे.
ग्रामीण विकासाला गती
या अर्थसंकल्पामुळे शिक्षण, महिला सक्षमीकरण, विज्ञान, दिव्यांग कल्याण आणि ग्रामीण विकासाच्या विविध योजनांना आर्थिक बळ मिळणार असून, पुणे जिल्ह्यातील ग्रामीण भागाच्या सर्वांगीण विकासाला गती मिळेल, असा विश्वास प्रशासनाने व्यक्त केला आहे.
