जेएनएन, मुंबई. माजी आमदार आणि अजित पवार गटाचे नेते बाबा सिद्दीकी यांच्या हत्येप्रकरणी नवा धक्कादायक बाब समोर आली आहे. बाबा सिद्दीकी यांचे पुत्र शहझीन (जीशान) सिद्दीकी यांनी भाजपा नेते मोहित कंबोज यांच्यावर गंभीर आरोप केला आहे. शहझीन यांनी पोलिसांकडे दिलेल्या निवेदनात म्हटले आहे की, “मोहित कंबोज यांनी माझ्या वडिलांचा ठावठिकाणा हल्लेखोरांना सांगितला.” या आरोपामुळे राजकीय वर्तुळात मोठी खळबळ उडाली आहे.
शहझीन यांनी पोलिसांना सांगितले की, त्यांच्या वडिलांनी नेहमीप्रमाणे आपल्या दैनंदिन कामकाजाची नोंद डायरीत केली होती. हत्येच्या दिवशी म्हणजेच 12 ऑक्टोबर 2024 रोजी त्यांनी त्या डायरीत मोहित कंबोज यांचे नाव नमूद केले होते. त्याच दिवशी सायंकाळी 5.30 ते 6.00 वाजेच्या दरम्यान बाबा सिद्दीकी आणि मोहित कंबोज यांच्यात व्हॉट्सअॅपवर संपर्क झाला असल्याचाही दावा शहझीन यांनी केला आहे.
सिद्दीकी यांनी काही दिवसांपूर्वी बांद्रा (पूर्व) परिसरातील SRA प्रकल्पातील गोंधळ आणि त्यासंबंधी काही बिल्डर्स व राजकीय व्यक्तींविरोधात आपली नाराजी व्यक्त केली होती. या सर्व घडामोडींनंतरच त्यांची हत्या करण्यात आल्याचा आरोप सिद्दीकी परिवाराने केला आहे.
माझा त्यांच्या हत्येशी काहीही संबंध नाही
दरम्यान, मोहित कंबोज यांनी सर्व आरोप फेटाळले आहेत. त्यांनी म्हटले आहे की, “बाबा सिद्दीकी हे माझे दीर्घकाळचे मित्र होते. त्यांच्याशी राजकीय आणि सामाजिक विषयांवर संवाद होत असे. माझा त्यांच्या हत्येशी काहीही संबंध नाही. सत्य समोर यावे म्हणून मी पोलिस तपासास पूर्ण सहकार्य करत आहे.”
या प्रकरणात पोलिसांनी सिद्दीकींच्या डायरीतील नोंदी, व्हॉट्सअॅप संवाद आणि SRA प्रकल्पातील व्यवहारांची छाननी सुरू केली आहे. दरम्यान, या हत्येमागील राजकीय-आर्थिक साखळी उघड होण्याची शक्यता व्यक्त केली जात आहे.
