जेएनएन, मुंबई: काँग्रेसच्या ज्येष्ठ नेत्या खासदार सोनिया गांधी यांच्या ‘Belonging : A Journey of Love’ या आत्मचरित्रावरून राज्यातील राजकीय वातावरण तापले आहे. या पुस्तकातील काही उल्लेखांवर आक्षेप घेत भाजप आणि एनडीएतील नेत्यांनी काँग्रेसवर टीकेची झोड उठवली आहे. त्यातच आता शिवसेना शिंदे गटानेही या पुस्तकाविरोधात आक्रमक भूमिका घेतली आहे. मात्र, सोनिया गांधी यांच्या पुस्तकाचा निषेध करताना शिंदे गटाच्या नेत्या शायना एनसी यांच्याकडून चक्क दिवंगत शिवसेनाप्रमुख बाळासाहेब ठाकरे यांचाच फोटो फाडला गेल्याचा प्रकार घडला. या घटनेमुळे राजकीय वर्तुळात खळबळ उडाली असून शिंदे गटाला नव्या वादाला सामोरे जावे लागत आहे.

माहितीनुसार, सोनिया गांधी यांच्या ‘Belonging : A Journey of Love’ या आत्मचरित्रातील स्वातंत्र्यवीर सावरकर यांच्याविषयीच्या कथित आक्षेपार्ह उल्लेखावरून शिवसेना शिंदे गटाने निषेध नोंदवला. यासाठी पक्षाच्या सहा प्रवक्त्यांनी पत्रकार परिषद घेतली. यावेळी सोनिया गांधी आणि काँग्रेसच्या भूमिकेवर टीका करत पुस्तकातील मजकुराचा निषेध करण्यात आला. या निषेधादरम्यान पुस्तकाची प्रत फाडण्याची कृती करण्यात आली.

मात्र, पुस्तक फाडण्याच्या या कृतीदरम्यान शायना एनसी यांच्याकडून बाळासाहेब ठाकरे यांचा फोटोही फाडला गेला. हा प्रकार लक्षात येताच पत्रकार परिषदेत गोंधळाचे वातावरण निर्माण झाले. सोनिया गांधी यांच्या पुस्तकाचा निषेध करण्यासाठी आयोजित केलेल्या कार्यक्रमात बाळासाहेबांचा फोटो फाडला गेल्याने या घटनेवरून नवा राजकीय वाद निर्माण झाला आहे.

दरम्यान, सोनिया गांधी यांच्या आत्मचरित्रावरून भाजप आणि काँग्रेसमध्ये गेल्या काही दिवसांपासून आरोप-प्रत्यारोप सुरू आहेत. पुस्तकातील ऐतिहासिक घटनांचे संदर्भ, काँग्रेसची भूमिका आणि गांधी कुटुंबाच्या राजकीय प्रवासातील काही प्रसंगांवर भाजप नेत्यांनी प्रश्न उपस्थित केले आहेत. दुसरीकडे, काँग्रेसकडून भाजप राजकीय फायद्यासाठी जुन्या घटनांचा मुद्दा उपस्थित करत असल्याचा आरोप केला जात आहे. 

शिवसेना शिंदे गटाच्या पत्रकार परिषदेत घडलेल्या या प्रकारामुळे पुस्तकातील मुद्द्यांपेक्षा बाळासाहेब ठाकरे यांचा फोटो फाडल्याची घटना अधिक चर्चेत आली आहे. बाळासाहेब ठाकरे हे शिवसेनेचे संस्थापक आणि पक्षाच्या राजकीय-संघटनात्मक वारशाचे प्रमुख प्रतीक मानले जातात. त्यामुळे त्यांच्या फोटोला झालेल्या या प्रकारामुळे शिंदे गटाच्या भूमिकेवरही प्रश्न उपस्थित होण्याची शक्यता आहे.

सोनिया गांधी यांच्या पुस्तकावरून सुरू झालेला राजकीय वाद आता बाळासाहेब ठाकरे यांच्या फोटोच्या मुद्द्यावरून नव्या वळणावर पोहोचला आहे. या घटनेवर शिंदे गटाकडून काय स्पष्टीकरण दिले जाते आणि विरोधक यावर कोणती भूमिका घेतात, याकडे राजकीय वर्तुळाचे लक्ष लागले आहे.