जेएनएन, मुंबई: मुंबई आणि उपनगरांमध्ये गेल्या काही दिवसांपासून प्रदूषणामुळे हवेची गुणवत्ता ‘अतिखराब’ या गभीर श्रेणीत पोहोचली आहे. वातावरणात धूळकण, धूर आणि इतर घातक कणांचे प्रमाण झपाट्याने वाढल्याने शहरावर दाट धुक्यासारखे प्रदूषणाचे सावट पसरले आहे. दृश्यमानता घटल्यामुळे वाहतूक व्यवस्थेलाही याचा मोठा फटका बसत आहे. वाढत्या प्रदूषणामुळे नागरिकांमध्ये आरोग्याबाबतची भीती निर्माण झाली आहे.अनेकांना श्वसनाचा त्रास, डोळे चुरचुरणे आणि घशात खवखव जाणवत असल्याच्या तक्रारी वाढल्या आहेत.
या गंभीर परिस्थितीची दखल घेत पर्यावरण कार्यकर्त्यांनी दाखल केलेल्या जनहित याचिकेवर आज मुंबई उच्च न्यायालयात तातडीची सुनावणी होणार आहे. न्यायालयाने परिस्थितीचे गांभीर्य ओळखून ही सुनावणी तत्काळ निश्चित केली. प्रशासनाने प्रदूषण नियंत्रणासाठी घेतलेल्या उपाययोजनांबाबत स्पष्टीकरण मागितले आहे. महानगरपालिकेने आणि महाराष्ट्र प्रदूषण नियंत्रण मंडळाने सध्या काही तात्पुरत्या उपाययोजना केले आहे.तरी त्यांचा प्रभाव पुरेसा नसल्याचे तज्ज्ञांचे मत आहे.
हवेची गुणवत्ता निर्देशांक (AQI) अनेक भागांत 350 पेक्षा जास्त नोंदवला गेला असून तो आरोग्यास अत्यंत धोकादायक समजला जात आहे. बांधकाम प्रकल्पांमधून उडणारी धूळ, वाहतूक कोंडीमुळे वाढणारा धूर आणि हवामानातील बदल यामुळे प्रदूषणात भर पडत असल्याचे पर्यावरण तज्ज्ञांचे निरीक्षण आहे.
या पार्श्वभूमीवर उच्च न्यायालयाने प्रशासनाकडून तात्काळ आणि दीर्घकालीन उपाययोजनांची माहिती मागितली आहे. दरम्यान न्यायालय प्रदूषण नियंत्रणासाठी आवश्यक असल्यास कडक निर्देश देण्याची शक्यता आहे. नागरिकांनीही अनावश्यक प्रवास टाळावा, मास्कचा वापर करावा आणि आरोग्याची काळजी घ्यावी, असे आवाहन केले आहे.