जेएनएन, ठाणे: डोंबिवलीतील खासगी रुग्णालयात दोन डॉक्टर आणि कर्मचाऱ्यांना मारहाण केल्याप्रकरणी अटक करण्यात आलेल्या शिवसेना (एकनाथ शिंदे गट) नगरसेवक रमेश म्हात्रे यांना मंगळवारी न्यायालयाने जामीन मंजूर केला. अटकेनंतर अवघ्या आठवडाभरात त्यांची जामिनावर सुटका झाली आहे.
६ जुलै रोजी डोंबिवलीतील एका रुग्णालयात नवजात बाळाला एनआयसीयू (NICU) मध्ये जागा नसल्याने दुसऱ्या रुग्णालयात हलविण्याचा सल्ला देण्यात आला होता. यानंतर संतप्त झालेल्या रमेश म्हात्रे आणि त्यांच्या समर्थकांनी रुग्णालयात घुसून दोन डॉक्टरांसह कर्मचाऱ्यांना मारहाण केल्याचा आरोप आहे. या घटनेचा व्हिडिओ सोशल मीडियावर व्हायरल झाल्यानंतर तीव्र संताप व्यक्त झाला होता.
या प्रकरणी ८ जुलै रोजी पोलिसांनी रमेश म्हात्रे यांना अटक केली. अटकेनंतर प्रकृती बिघडल्याचे कारण देत त्यांना ठाणे जिल्हा रुग्णालयात दाखल करण्यात आले. त्यांच्या वैद्यकीय स्थितीचा दाखला देत न्यायालयात व्हिडिओ कॉन्फरन्सिंगद्वारे हजर करण्याची मागणी पोलिस आणि बचाव पक्षाने केली होती. मात्र न्यायालयाने त्यांना प्रत्यक्ष हजर राहण्याचे आदेश दिले.
१० जुलै रोजी न्यायालयात हजर करण्यात आल्यानंतर प्रथम त्यांना तीन दिवसांची पोलीस कोठडी सुनावण्यात आली. त्यानंतर न्यायालयीन कोठडीत रवानगी करण्यात आली होती. अखेर मंगळवारी न्यायालयाने त्यांना जामीन मंजूर केला.
दरम्यान, अटकेपूर्वी रमेश म्हात्रे यांनी आपण कोणालाही मारहाण केली नसल्याचा दावा केला होता. महिला डॉक्टरच्या हातावरील फोन दूर करण्यासाठीच हात लावल्याचे त्यांनी सांगितले होते. मात्र मारहाण झालेल्या डॉक्टरांनी या घटनेनंतर धमक्या मिळत असल्याचा आरोप केला आहे.
हेही वाचा: Nashik News: नाशकात महिला पर्यटकाचा विनयभंग, कपडे फाडले, पाठलाग करून कुटुंबीयांना मारहाण; 9 जणांना अटक
