जेएनएन, मुंबई. राज्याचे दिवगंत उपमुख्यमंत्री अजित पवार यांची आज पहिली जंयती आहे. राज्यात विविध ठिकाणी त्यांना आदरांजली वाहिली जात आहे. त्यांच्या पत्नी उपमुख्यमंत्री सुनेत्रा पवार यांनीही X वर एक पोस्ट करून आपल्या भावना व्यक्त केला आहेत. त्यांनी ‘आज तुमचा जन्म दिवस 'जयंती' म्हणून मानताना माझं मन आतून पार तुटून जातंय. हे कटू सत्य स्वीकारायला माझं मन आजही अजिबात तयार होत नाही दादा…’ असं आपल्या पोस्ट मध्ये म्हटलं आहे.

सुनेत्रा पवारांची पोस्ट

‘दादा...

एवढी वर्ष तुमचा जन्मदिवस मी अगदी आनंदाने, उत्साहाने आणि अभिमानाने साजरा केला...

घर , कुटुंब आनंदात असायचं, शुभेच्छांचा वर्षाव असायचा..

पण आज तुमचा हाच दिवस 'जयंती' म्हणून मानताना माझं मन आतून पार तुटून जातंय.

    हे कटू सत्य स्वीकारायला माझं मन आजही अजिबात तयार होत नाही दादा...

    आयुष्याच्या प्रत्येक वळणावर तुम्ही माझी सर्वात मोठी ताकद बनून सोबत राहिलात.

    तुमचा तो भक्कम आधार, कठीण प्रसंगात पाठीवर पडणारी तुमची विश्वासू थाप आणि मला दिलेली साथ...

    आज हे सगळं अचानक हरवून गेलंय, सगळं सगळं पोरकं झालंय यावर विश्वासच बसत नाही.

    काळाने माझ्या आयुष्यातील सर्वात मोठा आधार एवढ्या लवकर हिरावून नेईल, असं स्वप्नातही वाटलं नव्हतं. 

    आज तुमचा हा दिवस साजरा करताना काळीज पिळवटून निघतंय, डोळ्यांतील अश्रू थांबायचं नाव घेत नाहीत.

    दादा, तुम्ही भलेही आज माझ्यासोबत शारीरिकदृष्ट्या नसलात, तरी तुमचे विचार, तुमच्या आठवणी , तुमचा लोकांप्रती सेवाभाव, शिस्त आणि तुम्ही दिलेलं प्रेम माझ्या प्रत्येक श्वासात, कणाकणात कायम जिवंत राहील… 

    माझ्या आयुष्याच्या साथीदाराला, तुमच्या पवित्र आठवणींना भावपूर्ण आणि आदरपूर्वक प्रणाम...!’ अशी उपमुख्यमंत्री सुनेत्रा पवार यांनी पोस्ट केली आहे.

    अजित पवारांचे अपघाती निधन

    अजित पवार हे स्थानिक निवडणुकीसाठी मुंबई येथून बारामतीला जात असताना त्यांचे विमान 28 जानेवारी रोजी सकाळी कोसळले होते. त्यात त्यांच्यासह 5 जणांचा मृत्यू झाला होता.