मुंबई. महाराष्ट्रातील सरकारी भरती प्रक्रियेतील कथित गैरव्यवहाराचा मुद्दा पुन्हा एकदा ऐरणीवर आला आहे. एफडीए (अन्न व औषध प्रशासन) अंतर्गत घेण्यात आलेल्या औषध निरीक्षक (Drug Inspector) भरती परीक्षेच्या कथित पेपरफुटी प्रकरणावर राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी मुंबईत पत्रकार परिषद घेऊन गंभीर आरोप केले. मात्र, या प्रकरणाला त्याचवेळी नवे वळण मिळाले असून तक्रारदारानेच आपली पूर्वीची तक्रार बनावट असल्याचा दावा केल्याची माहिती समोर आली आहे.

“पूर्ण पेपर फुटला नाही, पण पेपर सेट करणारी व्यक्ती फुटली”

रोहित पवार यांनी पत्रकार परिषदेत दावा केला की, या प्रकरणात एमपीएससीचा संपूर्ण पेपर फुटला असे म्हणता येणार नाही. मात्र, पेपर तयार करणाऱ्या व्यक्तीनेच पैशांच्या मोबदल्यात परीक्षेच्या दोन दिवस आधी काही विद्यार्थ्यांना प्रश्नपत्रिका उपलब्ध करून दिली, असा गंभीर आरोप त्यांनी केला.

रोहित पवार यांच्या अनुसार, महाराष्ट्रात काही वर्षांपासून सरकारी भरती परीक्षांमध्ये पेपरफुटीच्या घटना वारंवार घडत आहेत. पैसे घेऊन आणि विशिष्ट विचारसरणीची माणसे सरकारी व्यवस्थेत आणण्यासाठी एक संगठित नेटवर्क कार्यरत असल्याचा आरोपही त्यांनी केला.

तक्रारदाराचा यू-टर्न

दरम्यान, या प्रकरणाला रविवारी रात्री मोठे वळण मिळाले. एमपीएससीमधील माहितीनुसार, तक्रारदाराने आयोगाला आणखी एक ई-मेल पाठवून आपण यापूर्वी केलेली पेपरफुटीची तक्रार बनावट होती, असा दावा केला आहे.

    या ई-मेलमध्ये, “लवकर पुन्हा परीक्षा होणार नाही, या उद्देशाने पेपर फुटल्याची बतावणी करून पुनर्परीक्षा घेण्यासाठी हा बनाव रचण्यात आला,” असे नमूद करण्यात आल्याची माहिती आहे.

    विलंबाने तक्रार का?

    आयोगाकडून आता तक्रारीच्या वेळेवरही प्रश्न उपस्थित करण्यात आले आहेत. कथित संभाषण 20 मार्च रोजी झाले असल्याचा दावा करण्यात आला होता, मात्र त्याची तक्रार 24 जुलै रोजी करण्यात आली. इतका मोठा विलंब का झाला, याचाही तपास सुरू असल्याची माहिती समोर आली आहे.

    महाराष्ट्रातल्या तरुणांच्या भविष्याशी असा खेळ थांबवा - वडेट्टीवार

    काँग्रेस नेते विजय वडेट्टीवार यांनी सोशल मीडियावर पोस्ट करत म्हटले आहे की, MPSC च्या ड्रग इन्स्पेक्टर भरतीचा पेपर परीक्षेआधीच सोशल मीडियावर फुटल्याचे पुरावे फिरत आहेत! एकीकडे नीट पेपरफुटी प्रकरणी आंदोलनामुळे केंद्रीय शिक्षणमंत्र्यांचा राजीनामा झाला, तरी महाराष्ट्रातल्या महायुती सरकारला जाग येत नाहीये. यांनी राज्याच्या शिक्षण व्यवस्थेची,परीक्षांची पार वाट लावून टाकलीये. हा विद्यार्थ्यांचा विश्वासघात आहे! वर्षानुवर्षे अभ्यास करणाऱ्या पोरांच्या स्वप्नांचा रोज कचरा करायचा आणि भ्रष्ट दलालांचे खिसे भरायचे, हाच तुमचा धंदा उरलाय का? ड्रग इन्स्पेक्टर बनण्याआधीच या संपूर्ण सिस्टीममध्ये भ्रष्टाचाराचा भुसा भरला गेलाय! महायुती सरकारला फक्त विरोधकांचे पक्ष फोडायला आणि खोके गोळा करायला जमते, पोरांचे पेपर फुटताना मात्र डोळ्यावर पट्टी बांधून बसतात! या पेपर फुटीची उच्चस्तरीय चौकशी करून त्या दलालांना आणि त्यांच्या पाठीशी असलेल्या राजकीय शक्तीवर कारवाई करा! महाराष्ट्रातल्या तरुणांच्या भविष्याशी असा खेळ थांबवा.

    एमपीएससीची चौकशी सुरू

    तक्रार प्राप्त झाल्यानंतर एमपीएससीने तक्रारदाराला त्याच्याकडे असलेले सर्व पुरावे सादर करण्याचे निर्देश दिले. तसेच संबंधित उमेदवार आणि तक्रारदार यांना प्रत्यक्ष आयोगासमोर हजर राहण्यास सांगण्यात आले आहे.

    सोमवारी संबंधितांची चौकशी करण्यात येत असून, त्यांचे जबाब आणि उपलब्ध पुराव्यांच्या आधारे आयोग पुढील निर्णय घेणार असल्याचे सांगितले जात आहे.

    अद्याप आरोप सिद्ध नाहीत

    या प्रकरणात रोहित पवार यांनी गंभीर आरोप केले असले, तरी त्यांची अधिकृत चौकशी अद्याप सुरू आहे. दुसरीकडे, तक्रारदारानेच पूर्वीची तक्रार खोटी असल्याचा दावा केल्यामुळे प्रकरण अधिकच गुंतागुंतीचे झाले आहे. त्यामुळे एमपीएससीच्या चौकशी अहवालानंतरच पेपरफुटीचे आरोप खरे की खोटे, याबाबत स्पष्टता येण्याची शक्यता आहे.