परभणी/लातूर. Maharashtra Rain Update: गेल्या अनेक दिवसांपासून पावसाने दडी मारल्याने उकाडा आणि पिकांच्या वाढीवर परिणाम अशा दुहेरी संकटाचा सामना करणाऱ्या मराठवाड्यातील नागरिक आणि शेतकऱ्यांना अखेर काहीसा दिलासा मिळाला आहे. परभणी जिल्ह्यात जवळपास 40 दिवसांच्या प्रतीक्षेनंतर, तर लातूर शहर आणि परिसरात तब्बल दीड महिन्याच्या पावसाच्या खंडानंतर पावसाने हजेरी लावली आहे. पहाटेपासून परभणी जिल्ह्यातील विविध भागांत पावसाच्या सरी सुरू असून, लातूरमध्ये मध्यरात्रीनंतर ढगांच्या गडगडाटासह पावसाला सुरुवात झाली.
परभणीत 40 दिवसांनंतर पाऊस-
परभणी जिल्ह्यात मागील जवळपास 40 दिवसांपासून पावसाने विश्रांती घेतली होती. त्यामुळे खरीप हंगामातील पिकांवर मोठा परिणाम होण्याची भीती निर्माण झाली होती. सोयाबीन, कापूस आणि तूर या पिकांना पाण्याची गरज असताना पावसाने दडी मारल्याने शेतकऱ्यांची चिंता वाढली होती.
अशातच आज पहाटेपासून परभणी शहरासह जिल्ह्यातील विविध भागांत पावसाने सुरुवात केली. काही ठिकाणी संततधार पाऊस सुरू असल्याने वातावरणात मोठा बदल झाला आहे. दीर्घ प्रतीक्षेनंतर पाऊस झाल्याने शेतकऱ्यांच्या आशा पुन्हा पल्लवित झाल्या आहेत.
खरीप पिकांना पावसाचा किती फायदा होणार?
पावसाच्या दीर्घ खंडामुळे अनेक भागांतील खरीप पिकांना पाण्याची मोठी आवश्यकता निर्माण झाली होती. जमिनीतील ओलावा कमी झाल्याने पिकांच्या वाढीवर परिणाम झाला होता. आता झालेल्या पावसामुळे जमिनीतील ओलावा वाढण्यास मदत होणार आहे.
मात्र, हा पाऊस पिकांसाठी किती फायदेशीर ठरेल, हे पुढील काही तासांतील पावसाचे प्रमाण आणि त्यानंतरच्या हवामानावर अवलंबून असणार आहे. पुरेसा पाऊस झाल्यास सोयाबीन, कापूस, तूर यासह इतर खरीप पिकांना त्याचा फायदा होऊ शकतो. मात्र काही भागांत पिकांची अवस्था आधीच खराब झाली असल्याने केवळ एक-दोन पावसाच्या सरींमुळे नुकसान भरून निघेलच असे नाही.
लातूरमध्ये दीड महिन्यानंतर पावसाची हजेरी-
दरम्यान, लातूर शहर आणि परिसरातही दीड महिन्याच्या मोठ्या खंडानंतर पावसाने हजेरी लावली आहे. रात्री दीड वाजल्यानंतर ढगांच्या गडगडाटासह हलक्या ते मध्यम स्वरूपाच्या पावसाच्या सरी सुरू झाले आहेत.
पावसासोबत काही भागांत जोरदार वारेही वाहत आहेत. मध्यरात्रीनंतर सुरू झालेल्या पावसामुळे शहरातील वातावरणात गारवा निर्माण झाला आहे. गेल्या काही दिवसांपासून जाणवत असलेल्या प्रचंड उकाड्यामुळे लातूरकर त्रस्त झाले होते. त्यामुळे या पावसाने नागरिकांना काहीसा दिलासा मिळाला आहे.
जोरदार वारे आणि गडगडाट-
लातूर शहरात पावसासोबत ढगांचा गडगडाट आणि जोरदार वारे जाणवत आहेत. त्यामुळे नागरिकांमध्ये पहाटेच्या सुमारास काही काळ भीतीचे वातावरणही निर्माण झाले. शहरातील काही भागांत पावसाच्या सरींची तीव्रता वाढली होती.
दीड महिन्याच्या खंडानंतर झालेल्या पावसामुळे वातावरणातील उष्णता कमी झाली असून, नागरिकांना उकाड्यापासून तात्पुरता दिलासा मिळाला आहे.
शेतकऱ्यांच्या नजरा आता आकाशाकडे-
परभणी आणि लातूर या दोन्ही जिल्ह्यांमध्ये खरीप हंगामातील पिकांसाठी पावसाचे महत्त्व मोठे आहे. पावसाने मोठा खंड घेतल्याने अनेक शेतकऱ्यांच्या पिकांची अवस्था चिंताजनक झाली होती. आता झालेल्या पावसामुळे काही भागांत पिकांना नवसंजीवनी मिळण्याची शक्यता निर्माण झाली आहे.
