जेएनएन, मुंबई. कोकणात जाणाऱ्या प्रवाशांसाठी एक महत्त्वाची आणि दिलासादायक बातमी आहे. नवी मुंबई ते सिंधुदुर्गमधील चिपी विमानतळादरम्यान आजपासून नियमित विमानसेवा सुरू होत आहे. त्यामुळे मुंबई महानगर प्रदेशातून तळकोकणात जाणाऱ्या प्रवाशांचा प्रवास आता अधिक वेगवान आणि सुखकर होणार आहे. आतापर्यंत सिंधुदुर्गात जाण्यासाठी रस्ते किंवा रेल्वेने अनेक तासांचा प्रवास करावा लागत होता. मात्र, विमानसेवा सुरू झाल्याने नवी मुंबई ते चिपी हे अंतर अवघ्या एका तासात पार करता येणार आहे.

सिंधुदुर्ग जिल्हा हा पर्यटनाच्या दृष्टीने महत्त्वाचा असून दरवर्षी मोठ्या संख्येने पर्यटक कोकणात भेट देतात. तारकर्ली, मालवण, देवगड, वेंगुर्ला, आंबोली यांसारखी पर्यटनस्थळे पर्यटकांच्या आकर्षणाचे केंद्र आहेत. मात्र, मुंबई आणि नवी मुंबई परिसरातून सिंधुदुर्गात पोहोचण्यासाठी लागणारा प्रवासाचा वेळ ही अनेकदा पर्यटकांसाठी अडचण ठरत होती. सणासुदीच्या काळात कोकण रेल्वेतील गर्दी आणि महामार्गावरील वाहतूक कोंडीमुळे प्रवाशांना मोठा त्रास सहन करावा लागत होता.

आता नवी मुंबई ते चिपी विमानतळादरम्यान नियमित विमानसेवा सुरू झाल्याने या अडचणींवर काही प्रमाणात तोडगा निघण्याची शक्यता आहे. अवघ्या एका तासात तळकोकणात पोहोचता येणार असल्याने प्रवाशांचा वेळ वाचणार आहे. व्यावसायिक कामांसाठी वारंवार प्रवास करणारे नागरिक, कोकणातील मूळ गावी जाणारे चाकरमानी तसेच पर्यटनासाठी येणाऱ्या प्रवाशांना या सेवेचा फायदा होऊ शकतो.

पर्यटन आणि स्थानिक अर्थव्यवस्थेला चालना

चिपी विमानतळावरून विमानसेवा सुरू राहिल्यास सिंधुदुर्ग जिल्ह्यातील पर्यटन व्यवसायालाही चालना मिळण्याची अपेक्षा आहे. कमी वेळेत कोकणात पोहोचण्याची सुविधा उपलब्ध झाल्याने मुंबई, नवी मुंबईसह अन्य भागांतील पर्यटकांची संख्या वाढण्यास मदत होऊ शकते. याचा फायदा स्थानिक हॉटेल व्यावसायिक, पर्यटन कंपन्या, वाहतूक व्यावसायिक तसेच स्थानिक रोजगाराला होण्याची शक्यता आहे.

नवी मुंबई विमानतळ आणि चिपी विमानतळ यांच्यातील हवाई संपर्कामुळे कोकणाच्या दळणवळण व्यवस्थेतही महत्त्वाची भर पडणार आहे. मात्र, या विमानसेवेचा प्रत्यक्ष फायदा किती प्रवाशांना मिळतो, यासाठी तिकीटदर, उड्डाणांचे वेळापत्रक आणि नियमिततेला महत्त्व राहणार आहे.