जेएनएन, मुंबई : मराठी चित्रपटसृष्टीतील प्रतिभावान अभिनेत्री छाया कदम यांनी पुन्हा एकदा आपल्या अभिनयाची आंतरराष्ट्रीय स्तरावर छाप पाडली आहे. भारत-रशिया सहनिर्मित ‘स्नो फ्लॉवर’ या चित्रपटासाठी त्यांना BRICS+ आंतरराष्ट्रीय चित्रपट महोत्सवात ‘स्पेशल अवॉर्ड ऑफ द फेस्टिव्हल’ या विशेष पुरस्काराने सन्मानित करण्यात आले आहे. ही आनंदाची बातमी स्वतः छाया कदम यांनी सोशल मीडियावर पोस्ट शेअर करत चाहत्यांसोबत सांगितली.

छाया कदम यांनी सोशल मीडियावरील पोस्टमध्ये या पुरस्काराबद्दल आनंद व्यक्त केला. ‘स्नो फ्लॉवर’ हा चित्रपट आणि त्यातील आपली भूमिका आपल्यासाठी नेहमीच खास राहील, अशी भावना त्यांनी व्यक्त केली. या चित्रपटाच्या माध्यमातून मिळालेला सन्मान हा आपल्यासाठी अभिमानाचा क्षण असल्याचेही त्यांनी म्हटले.

कोकणच्या लाल मातीतून सायबेरियाच्या बर्फापर्यंत पोहोचली कथा
‘स्नो फ्लॉवर’ हा भारत आणि रशिया यांच्या सहनिर्मितीतून तयार झालेला चित्रपट आहे. या सिनेमाची कथा कोकणातील लाल मातीपासून सुरू होते आणि सायबेरियाच्या बर्फाळ प्रदेशात एकरूप होते. दोन वेगवेगळ्या भौगोलिक आणि सांस्कृतिक पार्श्वभूमींचा अनोखा संगम या चित्रपटातून पाहायला मिळतो.

या चित्रपटातील आपली भूमिका विशेष असल्याचे छाया कदम यांनी सांगितले. त्यामुळे या सिनेमासाठी मिळालेला आंतरराष्ट्रीय पुरस्कार त्यांच्यासाठी अधिक महत्त्वाचा ठरला आहे.

दिग्दर्शक आणि निर्मात्यांचे मानले आभार
पुरस्कार मिळाल्यानंतर छाया कदम यांनी चित्रपटाचे दिग्दर्शक गजेंद्र अहिरे यांचे विशेष आभार मानले. त्यांच्याशिवाय हा प्रवास शक्य झाला नसता, अशा भावना त्यांनी व्यक्त केल्या.

तसेच लेखक दीपक कुमार आणि निर्माता सफू गोवा यांचेही त्यांनी आभार मानले. कलाकारांवर आणि कलेवर मनापासून प्रेम करणारे निर्माते प्रत्येकाच्या वाट्याला यावेत, असेही त्यांनी आपल्या पोस्टमध्ये म्हटले.

    या प्रवासात साथ देणाऱ्या संपूर्ण चित्रपटाच्या टीमचे तसेच आपल्यावर प्रेम करणाऱ्या प्रेक्षकांचे छाया कदम यांनी मनापासून आभार मानले आहेत.

    हेही वाचा: ‘मामांनी प्रत्येक फ्रेममध्ये उमटवली छाप’; अशोक सराफ यांच्या ‘आदि अनंत’ चित्रपटाचे रितेश देशमुखकडून कौतुक