जेएनएन, मुंबई: मराठी चित्रपटसृष्टीतील ज्येष्ठ अभिनेते अशोक सराफ यांची प्रमुख भूमिका असलेला ‘आदि अनंत’ हा चित्रपट सध्या चर्चेत आहे. अभिनेता रितेश देशमुख यानेही या चित्रपटाचे भरभरून कौतुक केले आहे. सोशल मीडियावर खास पोस्ट शेअर करत त्याने चित्रपटातील कलाकारांच्या अभिनयाचे आणि दिग्दर्शनाचे विशेष कौतुक केले आहे. तसेच प्रेक्षकांनी हा चित्रपट आवर्जून चित्रपटगृहात जाऊन पाहावा, असे आवाहनही त्याने केले आहे.
रितेश देशमुखने आपल्या पोस्टमध्ये अशोक सराफ यांचा उल्लेख ‘माझे सर्वकालीन आवडते मामा’ असा केला आहे. अशोक सराफ यांनी चित्रपटातील प्रत्येक फ्रेममध्ये आपल्या अभिनयाची छाप सोडल्याचे त्याने म्हटले आहे. याशिवाय अभिनेता संकर्षण कऱ्हाडे याने आपली भूमिका अप्रतिमरीत्या साकारल्याचे, तर सखी गोखलेने आपल्या अभिनयाने चित्रपटातील दृश्यांना अधिक रंगत आणल्याचेही रितेशने नमूद केले.

या चित्रपटाचे दिग्दर्शन आपला भाऊ महेश लिमये याने केल्याचा उल्लेख करत रितेशने त्याचेही कौतुक केले. विशेष म्हणजे, रितेश देशमुखने या चित्रपटात आपणही असल्याचे पोस्टमधून सांगितले आहे.
रितेशच्या या पोस्टमुळे ‘आदि अनंत’ या चित्रपटाची चर्चा आणखी वाढली आहे. ज्येष्ठ अभिनेते अशोक सराफ यांचा दमदार अभिनय, संकर्षण कऱ्हाडे आणि सखी यांची साथ तसेच महेश लिमये यांचे दिग्दर्शन यामुळे हा चित्रपट प्रेक्षकांसाठी खास ठरत आहे. त्यामुळे मराठी चित्रपटप्रेमींनी ‘आदि अनंत’ चित्रपटगृहात जाऊन पाहावा, असे आवाहन रितेश देशमुखने केले आहे.
हेही वाचा: 'तू खूप प्रामाणिक होतास'; रामायणच्या सेटवर नितेश तिवारी यांनी आदिनाथ कोठारेला काय सांगितले?
