डिजिटल डेस्क, नवी दिल्ली. Ahmedabad Plane Crash: अहमदाबाद विमान अपघातावरील विमान अपघात अन्वेषण ब्युरोचा (AAIB) आलेला प्राथमिक अहवाल सातत्याने चर्चेत आहे. या अहवालात विमान अपघातामागे इंधन पुरवठा खंडित (फ्यूल कटऑफ) झाल्याची शक्यता वर्तवण्यात आली आहे, ज्यामुळे पायलट संघटनेचा संताप भडकला आहे. एअरलाइन पायलट असोसिएशन ऑफ इंडियाने (ALPA-India) विमान अपघाताच्या चौकशीत सहभागी करून घेण्याची मागणी केली आहे.

इंडियन कमर्शियल पायलट असोसिएशनने (ICPA) पायलटने विमानाचा इंधन पुरवठा खंडित केल्याच्या सिद्धांताचा तीव्र निषेध केला आहे. ICPA चे म्हणणे आहे की, चौकशी पूर्ण होण्याआधी पायलटवर अशाप्रकारे आरोप लावणे योग्य नाही. पायलटच्या आत्महत्येचा हा आरोप पूर्णपणे निराधार आहे.

ICPA ने केला विरोध

ICPA नुसार, अपघातानंतर मीडिया आणि सामान्य जनतेमध्ये ज्या प्रकारच्या चर्चा सुरू आहेत, त्यामुळे आम्ही अत्यंत दुःखी आहोत. पायलटने आत्महत्या केल्याचा हा आरोप मूर्खपणाचा आणि निराधार आहे. अशा प्रकारच्या दाव्यांना कोणताही आधार नाही. प्राथमिक चौकशी आणि अपुऱ्या माहितीच्या आधारे असे आरोप लावणे हे केवळ बेजबाबदारपणाचेच नाही, तर त्यांच्या कुटुंबाप्रती असंवेदनशीलतेचेही दर्शन घडवते.

ALPA-India ने केली चौकशीत सहभागी होण्याची मागणी

एअरलाइन पायलट असोसिएशन ऑफ इंडियाने (ALPA-India) विमान अपघाताच्या चौकशीत सहभागी होण्याची मागणी केली आहे. ALPA-India 800 एअरलाइन्स आणि हेलिकॉप्टर कंपन्यांचे प्रतिनिधित्व करते. तसेच ही संस्था इंटरनॅशनल फेडरेशन ऑफ एअरलाइन पायलट्स असोसिएशनशी (IFALPA) संलग्न आहे. जगभरातील 100 देशांमधील 1 लाख पायलट IFALPA चे सदस्य आहेत.

    AAIB च्या अहवालावर उपस्थित केले प्रश्न

    ALPA-India चे अध्यक्ष सॅम थॉमस यांनी वृत्तसंस्था पीटीआयशी बोलताना सांगितले की, "AAIB चा प्राथमिक अहवाल वेबसाइटवर टाकण्यात आला. त्यावर कोणाचीही सही नव्हती. आम्हाला पारदर्शकता हवी आहे. आमची इच्छा आहे की चौकशी पथकात आमच्या प्रतिनिधीचाही समावेश केला जावा."

    सॅम थॉमस यांच्या मते,

    "चौकशीच्या गोपनीयतेमुळे आम्ही हैराण आहोत. आम्हाला वाटते की चौकशीत पायलट्सना विमान अपघातासाठी जबाबदार ठरवले जात आहे. आम्ही याच्या तीव्र विरोधात आहोत."

    अहमदाबाद विमान अपघात

    12 जून रोजी अहमदाबादच्या सरदार वल्लभभाई पटेल विमानतळावरून एअर इंडियाच्या AI171 विमानाने 230 प्रवासी आणि 12 क्रू मेंबर्ससह उड्डाण केले होते. काही अंतर जाताच विमानाने थ्रस्ट देणे बंद केले आणि ते बीजे मेडिकल कॉलेजवर जाऊन आदळले. या अपघातात 260 लोकांचा मृत्यू झाला होता. अपघातानंतर 1 महिन्याने 12 जुलै रोजी AAIB ने 15 पानांचा प्राथमिक अहवाल जारी केला, ज्यात विमान अपघाताचे कारण फ्यूल कटऑफ असल्याचे सांगितले जात आहे.