जेएनएन, पुणे: बारामती नगरपरिषद निवडणुकांमध्ये दोन प्रभागांतील दोन जागांच्या निवडणुका तात्पुरत्या पुढे ढकलण्यात आले आहेत. प्रभाग क्रमांक 13 (ब) आणि प्रभाग क्रमांक 17 (अ) या दोन जागांसंदर्भात उद्भवलेल्या कायदेशीर व तांत्रिक अडचणींच्या पार्श्वभूमीवर निवडणूक निर्णय अधिकाऱ्यांनी ही प्रक्रिया स्थगित करण्याचा निर्णय घेतला आहे. मात्र नगराध्यक्ष पदासह उर्वरित सर्व जागांच्या निवडणुका ठरलेल्या वेळापत्रकानुसारच होणार आहेत, अशी माहिती निवडणूक प्रशासनाने दिली.
निवडणूक जाहीर झाल्यानंतर ही परिस्थिती निर्माण झाली आहे. निवडणूक जाहीर झाल्यानंतर अर्ज माघारी घेण्याची अंतिम मुदत पूर्ण झाल्यानंतर 26 नोव्हेंबर रोजी दोन उमेदवारी अर्ज नव्याने दाखल झाले. हे अर्ज तांत्रिक कारणांमुळे नामंजूर करण्यात आले होते. परंतु या निर्णयावर असमाधान व्यक्त करत भाजपचे सतीश फाळके आणि अविनाश गायकवाड यांनी न्यायालयात धाव घेत याचिका दाखल केली.
या याचिकेवर सुनावणी करत सत्र न्यायालयाने निवडणूक अधिकाऱ्यांना हे अर्ज स्वीकारण्याचे निर्देश दिले. न्यायालयाच्या या आदेशानंतर निवडणूक आयोगाने संबंधित दोन प्रभागांसाठी निवडणूक प्रक्रिया तातडीने स्थगित केली आहे. नव्या सुधारित आदेशानंतरच या दोन जागांसाठी पुढील प्रक्रिया सुरू करण्यात येणार आहे.
दरम्यान, या घडामोडींमुळे बारामतीतील राजकीय वातावरण तापले आहे.सर्व पक्षांचे लक्ष या दोन प्रभागांवर केंद्रीत झाले आहे. नगराध्यक्षपदासह उर्वरित प्रभागांसाठी मात्र प्रचाराची रणधुमाळी सुरू असून निवडणूक पूर्वनिश्चित वेळापत्रकानुसार पार पडणार आहे. दोन जागांवरील स्थगितीचा अंतिम निकाल काय येतो आणि पुढील प्रक्रिया केव्हा सुरू होते, याकडे मतदार आणि राजकीय पक्षांचे लक्ष लागले आहे.