जेएनएन, मुंबई: मुंबईची जीवनवाहिनी मानली जाणारी मुंबई लोकलची पश्चिम रेल्वेची वाहतूक सेवा कोलमडली आहे. माहीम स्थानकावर तांत्रिक बिघाड झाल्याने रेल्वे सेवा विस्कळीत झाली आहे. जलद मार्गावरील रेल्वे 15 ते 20 मिनिटे उशिरा धावत आहे. माहीम येथे बिघाड झाल्याने दादर ते वांद्रे, बोरिवली, वसई, विरारकडे जाणाऱ्या रेल्वे गाड्या 15 ते 20 मिनिटे उशिराने धावत आहेत. तर वसई-विरारकडून येणाऱ्या गाड्या वांद्रे स्थानकावर थांबवल्या असून, त्याही 15 ते 20 मिनिटे उशिरा धावत आहेत.
माहीम स्थानकावर बिघाड झाल्याने वसई, विरार, बोरिवलीकडील चाकरमान्यांची मोठी गैरसोय झाली आहे. आज पश्चिम वाहिनीवर चाकरमान्यांना उशिराने ऑफिसला पोहोचावे लागणार आहे. रेल्वे दुरुस्तीचे काम सुरू असून, ऑफिसला जाण्यासाठी प्रवासी पायी रेल्वे रुळावरून चालू लागले आहेत. माहीम येथील तांत्रिक बिघाड लवकरच दुरुस्त होईल, अशी माहिती रेल्वे विभागाने दिली आहे.
दोन दिवसांपूर्वीच दोन रेल्वे गाड्यांच्या धक्क्याने 8 जण खाली पडले होते आणि 6 प्रवाशांचा मृत्यू झाला होता. पुन्हा जीव हातात घेऊन प्रवासी रेल्वे रुळावरून चालत असल्याने रेल्वे विभागाला सुरक्षेच्या दृष्टीने अडचण होत आहे. रेल्वेचे सुरक्षाबळ प्रवाशांना रेल्वे रुळावरून न चालण्याचे आवाहन करत आहे.