जेएनएन, मुंबई: मुंबईतील मेट्रो प्रकल्पांच्या कामांना गती देण्याचे प्रयत्न सुरू असतानाच अंधेरी ते वांद्रे दरम्यानच्या मेट्रो 2 बी मार्गिकेच्या कामावर विलंबाचे सावट निर्माण झाले आहे. मुंबई महानगर प्रदेश विकास प्राधिकरणाने (MMRDA) या मार्गिकेचे काम मार्च 2027 पर्यंत पूर्ण करण्याचे लक्ष्य ठेवले असले, तरी प्रत्यक्ष कामातील अडथळे पाहता हे लक्ष्य गाठणे आव्हानात्मक ठरण्याची शक्यता आहे. तीन महत्त्वाचे गर्डर उभारण्याचे काम अद्याप बाकी असल्याने प्रकल्पाच्या वेळापत्रकावर परिणाम होण्याची चिन्हे आहेत.

एमएमआरडीएकडून मेट्रो 2 बी मार्गिकेच्या कामाला वेग आल्याचा दावा केला जात आहे. मात्र, अंधेरी-वांद्रे या महत्त्वाच्या टप्प्यातील बांधकामासाठी अनेक तांत्रिक आणि वाहतूकविषयक अडचणींचा सामना करावा लागत आहे. त्यामुळे मार्च 2027 च्या निर्धारित मुदतीत काम पूर्ण होणार का, असा प्रश्न उपस्थित होत आहे.

जुहू सर्कलमध्ये गर्डर उभारणीचे मोठे आव्हान
या मार्गिकेवरील जुहू सर्कल परिसरात गर्डर उभारणीचे काम सर्वाधिक आव्हानात्मक ठरत आहे. येथे एकूण 20 गर्डर बसवायचे असून, त्यापैकी 17 गर्डर आतापर्यंत उभारण्यात आले आहेत. उर्वरित तीन गर्डर बसवण्याचे काम पूर्ण करणे एमएमआरडीएसमोरचे मोठे आव्हान आहे. हे गर्डर सुमारे 33 मीटर लांबीचे असून, प्रत्येक गर्डरचे वजन तब्बल 115 टन आहे.

गर्डर उभारणीसाठी मोठ्या क्षमतेच्या क्रेनचा वापर करावा लागणार आहे. मात्र, जुहू सर्कल परिसरातील गुलमोहर रोड अरुंद असल्याने क्रेन उभी करण्यासाठी पुरेशी जागा उपलब्ध होत नाही. त्यातच या रस्त्यावर वाहनांची सतत वर्दळ असते. परिसरात जवळच इमारती असल्याने अवजड यंत्रसामग्रीच्या साहाय्याने काम करताना अतिरिक्त खबरदारी घ्यावी लागत आहे. या सर्व अडचणींमुळे गर्डर उभारणीच्या कामाचा वेग मर्यादित झाला आहे.

रात्रीच्या वेळी काम करण्याचे नियोजन
गर्डर उभारणीच्या कामामुळे दिवसा वाहतुकीला मोठा अडथळा निर्माण होऊ शकतो. त्यामुळे वाहतुकीवरील परिणाम कमी करण्यासाठी रात्रीच्या वेळी गर्डर बसवण्याचे नियोजन एमएमआरडीएकडून करण्यात आले आहे. यासाठी आवश्यकतेनुसार संबंधित रस्त्यांवरील वाहतूक तात्पुरती बंद ठेवून काम पूर्ण करण्याचा प्रयत्न केला जाणार आहे. 18 नोव्हेंबरपर्यंत उर्वरित गर्डर बसवण्याचे लक्ष्य ठेवण्यात आल्याची माहिती आहे.

75 टक्के काम पूर्ण, तरीही मुदतीचे आव्हान
अंधेरी पश्चिम ते सरस्वती नगर हा मेट्रो 2 बी मार्गिकेचा 7.53 किलोमीटरचा टप्पा असून, या मार्गावर सहा स्थानके आहेत. या टप्प्यावरील स्थापत्य आणि यंत्रणा विषयक कामांची एकत्रित प्रगती सुमारे 75 टक्के झाली आहे. हा टप्पा 31 मार्च 2027 पर्यंत प्रवाशांच्या सेवेत दाखल करण्याचे नियोजन आहे. मात्र, गर्डर उभारणीसह त्यानंतरची ट्रॅक जोडणी, विद्युत यंत्रणा, सिग्नलिंग आणि चाचण्यांची कामेही पूर्ण करावी लागणार आहेत. त्यामुळे उर्वरित कामांसाठी उपलब्ध असलेला कालावधी महत्त्वाचा ठरणार आहे.

हेही वाचा: Pandharpur Well Accident: पंढरपूरच्या आंबे गावात विहीर दुर्घटना, चौघांचा मृत्यू; NDRF चे रेस्क्यू ऑपरेशन पूर्ण