जेएनएन, मुंबई: आयआयटी बॉम्बेचे नाव बदलून ‘IIT Mumbai’ करण्यासाठी राष्ट्रवादी काँग्रेस पार्टी शरदचंद्र पवार युवकचे मुंबई अध्यक्ष अमोल मातेले यांनी मुख्यमंत्री देवेंद्र फडणवीस यांना ई-मेलद्वारे मागणी सादर केली आहे.
IIT सारख्या राष्ट्रीय स्तरावरील संस्थेच्या नावात असलेला ब्रिटिशकालीन “Bombay” हा शब्द बदलून “Mumbai” करण्यात यावे, अशी मागणी पत्रात केली आहे.
केंद्रीय विज्ञान आणि तंत्रज्ञान मंत्र्यांनी अलीकडेच IIT Bombay मधील “Bombay” हा शब्द कायम ठेवण्याचे मत व्यक्त केले होते. या विधानानंतर महाराष्ट्रातील मराठी नागरिकांमध्ये नाराजी निर्माण झाल्याचे मातेले यांनी पत्रात नमूद केले आहे. “मुंबई” हा शब्द मराठी अस्मिता, इतिहास आणि सांस्कृतिक ओळख यांचे प्रतीक असून “Bombay” हा पूर्णपणे ब्रिटिशकालीन अवशेष आहे. 1995 पासून सरकारने अधिकृतरीत्या “Bombay” ऐवजी “मुंबई” हे नाव स्वीकारले असून सर्व प्रशासकीय आणि कायदेशीर व्यवहारात “मुंबई” हाच शब्द वापरला जातो असेही पत्रात नमुद केले आहे.
भारत सरकार व राज्य सरकारने कलकत्ता-कोलकाता, मद्रास-चेन्नई, त्रिवेंद्रम-तिरुवनंतपुरम यांसारखे अनेक ऐतिहासिक नामांतर स्वीकारलेले असताना IIT सारख्या प्रमुख संस्थेच्या नावात “Bombay” कायम ठेवणे ही धोरणातील विसंगती असल्याचे मातेले यांनी म्हटले आहे. “IIT Mumbai” हे नाव जागतिक स्तरावर अधिक स्पष्ट ओळख निर्माण करेल तसेच मराठी तरुणांमध्ये संस्थेबद्दल भावनिक जवळीक वाढेल, असेही पत्रात नमूद केले आहे.
मुख्यमंत्र्यांना दिलेल्या मागणीत मातेले यांनी केंद्र सरकार आणि मानव संसाधन विकास मंत्रालयाकडे औपचारिक प्रस्ताव सादर करून “Indian Institute of Technology Mumbai (IIT Mumbai)” असे नामांतर तातडीने करण्याची विनंती केली आहे. हे केवळ नामांतर नसून महाराष्ट्राच्या सांस्कृतिक स्वाभिमानाचा सन्मान असल्याचे मातेले यांनी स्पष्ट केले आहे.