आयएएनएस, हैदराबाद: Hyderabad Family Accident In USA: हैदराबादमधील एका कुटुंबातील चार सदस्यांचा रविवारी अमेरिकेत झालेल्या एका भीषण रस्ते अपघातात जळून मृत्यू झाला. संपूर्ण कुटुंब सुट्ट्या साजऱ्या करण्यासाठी अमेरिकेला गेले होते. या दरम्यान, एका मिनी ट्रकने त्यांच्या कारला धडक दिली, ज्यामुळे कारला आग लागली आणि आत बसलेले सर्व जण जिवंत जळाले. या घटनेने हैदराबादमधील त्यांच्या नातेवाईकांवर आणि मित्रपरिवारावर दुःखाचा डोंगर कोसळला आहे.
अटलांटाहून डॅलसला जात होते कुटुंब
मूळचे हैदराबादचे रहिवासी असलेले श्री वेंकट, त्यांची पत्नी तेजस्विनी आणि त्यांची दोन मुले अमेरिकेतील डॅलस येथे सुट्ट्या घालवण्यासाठी गेले होते. जेव्हा ते अटलांटा येथील आपल्या नातेवाईकांना भेटून डॅलसला परतत होते, तेव्हाच ही दुर्दैवी घटना घडली. चुकीच्या दिशेने येणाऱ्या एका मिनी-ट्रकने त्यांच्या कारला जोरदार धडक दिली, ज्यामुळे काही क्षणांतच कारने पेट घेतला.
या अपघाताची तीव्रता इतकी होती की, कारमधील कोणालाही बाहेर पडण्याची संधी मिळाली नाही. श्री वेंकट, तेजस्विनी आणि त्यांची दोन मुले, अशा संपूर्ण कुटुंबाचा या आगीत होरपळून मृत्यू झाला. या घटनेची माहिती मिळताच स्थानिक आपत्कालीन सेवा आणि पोलीस घटनास्थळी दाखल झाले, पण तोपर्यंत खूप उशीर झाला होता.
मृतांचे डीएनए परीक्षण सुरू
अपघातानंतर कारला लागलेल्या आगीमुळे मृतदेह इतके जळाले आहेत की त्यांची ओळख पटवणे कठीण झाले आहे. त्यामुळे, मृतांची ओळख निश्चित करण्यासाठी डीएनए परीक्षण (DNA Test) केले जात आहे. या चाचण्यांचे निकाल आल्यानंतर, मृतदेह नातेवाईकांच्या ताब्यात दिले जातील. हैदराबादमधील त्यांचे कुटुंबीय मृतदेह भारतात परत आणण्यासाठी आवश्यक प्रक्रिया पूर्ण करत आहेत. या हृदयद्रावक घटनेमुळे संपूर्ण हैदराबाद शहरात हळहळ व्यक्त केली जात आहे.