जेएनएन, पुणे: शहरात ‘कोयता गँग’ची दहशत दिवसेंदिवस वाढत आहे.पुण्यातील नागरिकांच्या सुरक्षेचं मोठे आव्हान निर्माण झाले आहे. शहरातील विविध भागांत कोयत्याच्या धाकावर गुंडगिरी, लूटमार आणि वाहनांची तोडफोड करण्याच्या घटना समोर येत आहेत. अशीच एक धक्कादायक घटना पुण्यातील विमाननगर परिसरात घडली असून या प्रकाराने परिसरातील नागरिक भयभीत झाले आहेत.
26 तारखेला मध्यरात्रीच्या सुमारास कोयता गँगच्या पाच ते सहा गुंडांनी एका पानटपरीवाल्यावर अचानक हल्ला चढवला. कोयता गँगने टपरीवर धुमाकूळ घालत सिगारेट, विमल आणि इतर वस्तू देण्याची जबरदस्ती केली. दुकानात असलेल्या व्यक्तीला कोयत्याच्या धाकावर धमकावत ते हव्या त्या वस्तू उचलून घेऊन गेले. दुकान मालकाने परिस्थिती पाहून स्वतःचा जीव वाचवण्यासाठी त्यांच्याकडे असलेली मागितलेली वस्तू दिली.
दरम्यान, एका गुंडाने टोळक्याच्या उन्मत्तपणात अचानक कोयता बाहेर काढत दुकान फोडण्यास सुरुवात केली. शटर, काउंटर आणि दुकानातील सामग्रीवर वार करत मोठ्या प्रमाणावर नुकसान केले. परिसरातील नागरिक हे दृश्य पाहून घाबरले असून जीव वाचवण्यासाठी पळ काढला. काही वेळ दहशत माजवल्यानंतर गुंड तेथून पसार झाले.
घटनेनंतर थोड्या वेळाने दुकानदार जखमी अवस्थेत दुकानाची स्थिती पाहत असताना तोच गुंड पुन्हा परत आला आणि पुन्हा एकदा कोयता दाखवत धमकावले. त्याने हव्या त्या वस्तू पुन्हा उचलून नेल्या. संपूर्ण प्रकारातील सर्वात महत्त्वाचं म्हणजे, ही घटना सीसीटीव्ही कॅमेऱ्यात कैद झाली असून पोलिस तपासासाठी महत्त्वाचा पुरावा ठरू शकते.
या घटनेनंतर विमाननगर परिसरात भीतीचे वातावरण निर्माण झाले आहे. नागरिकांनी गुंडांच्या या वाढत्या बिंदास्त हालचालींवर कारवाई करण्यासाठी पोलीस प्रशासनाने तातडीने कठोर भूमिका घ्यावी, अशी मागणी केली आहे.