Maharashtra Crime News : महाराष्ट्राच्या राजकारणात खळबळ उडवून देणारी बातमी समोर आली आहे. बीडमध्ये राष्ट्रवादी काँग्रेस शरद पवार गटाचे नेते राम खाडे यांच्यावर जीवघेणा हल्ला झाल्याची घटना समोर आली आहे. राम खाडे यांच्यावर बुधवारी रात्री 10 ते 15 जणांनी धारदार शस्त्रांनी हल्ला केला. अहिल्यानगर - बीड जिल्ह्याच्या सीमेलगत मांदगाव रस्त्यावर हा प्रकार घडला. राम खाडे आपल्या गाडीतून जात असताना हा हल्ला झाला. हल्लेखोरांनी त्यांची गाडी पूर्णपणे फोडून टाकली आहे,
या हल्ल्यात खाडे गंभीर जखमी झाले असून त्यांच्यावर अहिल्यानगरमधील खासगी रुग्णालयात उपचार सुरू आहेत. हा हल्ला कुणी केला या संदर्भात अद्याप माहिती मिळू शकलेली नाही. दरम्यान राजकीय कटाचा भाग म्हणून हा हल्ला झाल्याचे सांगितले जात आहे.
राम खाडे हे शरद पवार गटाचे पदाधिकारी आहेत. ते मांदगाव येथून बीड जिल्ह्यात येत असताना 10 ते 15 जणांच्या टोळक्याने त्यांची गाडी अडवून त्यांच्यावर हल्ला केला. हल्लेखोरांनी राम खाडे यांच्या गाडीवर जोरदार दगडफेक करत सत्तूर व अन्य शस्त्रांनी हल्ला केला. यामध्ये राम खाडे गंभीर जखमी झाले आहेत.
त्यांना जखमी अवस्थेत अहिल्यानगरमधील एका खासगी रुग्णालयात दाखल केले. त्यांच्यावर उपचार सुरु असून प्रकृती गंभीर बनल्याने त्यांना तातडीने पुण्याला हलविण्यात आले आहे.