जेएनएन, अहिल्यानगर: जिल्हा मध्यवर्ती सहकारी बँकेच्या अध्यक्षपदावर मोठा बदल घडून आला आहे. राज्याचे मंत्री राधाकृष्ण विखे पाटील यांनी महायुतीचा धर्म पाळत राष्ट्रवादी काँग्रेस अजित पवार गटाचे नेते चंद्रशेखर घुले यांची बिनविरोध अध्यक्षपदी निवड करण्यात आली.
बदलत्या राजकीय घडामोडींमध्ये मंत्री राधाकृष्ण विखे पाटील यांनी महायुती धर्म पाळल्याची जोरदार चर्चा सध्या सुरू आहे.
बिनविरोध निवडीमागील राजकीय संकेत
अहिल्यानगर जिल्हा राजकारणात विखे गटांचा दबदबा सर्वांनाच परिचयाचा आहे. मात्र जिल्हा बँकेच्या कामकाजाचा आगामी कालावधी सुरळीत पार पडावा, या दृष्टीने विखे यांनी घुले यांच्या नावाला मान्यता दिली. या निर्णयामुळे जिल्ह्यात सहकार क्षेत्रात नव्या समीकरणांना सुरुवात झाल्याची राजकीय वर्तुळात चर्चा सुरू आहे.
फक्त तीन महिन्यांचा कार्यकाळ
जिल्हा बँकेच्या विद्यमान संचालक मंडळाची मुदत पुढील तीन महिन्यांत संपणार आहे. त्यामुळे अध्यक्षपदाची ही निवड तात्पुरत्या स्वरूपाची असेल. नवीन संचालक मंडळाची निवडणूक वेळेत घेण्यात कोणतीही अडचण नाही, असे पालकमंत्री राधाकृष्ण विखे पाटील यांनी स्पष्ट केले आहे.
बँकेच्या कामकाजाला स्थैर्य देण्याचा उद्देश
- आर्थिक वर्षअखेरचा आढावा
- पिक कर्ज वितरण
- पुनर्गठनाशी संबंधित निर्णय
- विविध सहकारी संस्थांशी समन्वय
या सर्व प्रक्रियांचा महत्त्वाचा कालावधी सुरु असल्याने अध्यक्षपद रिक्त राहू नये, हा बिनविरोध निवडीमागील निर्णायक मुद्दा असल्याचे विखे यांनी सांगितले आहे.